У Пінскім і Івацэвіцкім раёнах адбыліся трагічныя выпадкі: два чалавекі памерлі пасля ўкусаў насякомых, паведамілі ў Дзяржкамітэце судовых экспертыз.
У Пінскім раёне ахвярай стаў 51-гадовы мужчына. Ён вярнуўся ў дом і паспеў сказаць жонцы, што яго ўкусіла насякомае ў двары, пасля чаго страціў прытомнасць і ўпаў. Медыкі, якія прыбылі на месца, толькі канстатавалі смерць.
Падобная сітуацыя адбылася ў Івацэвіцкім раёне. 67-гадовы жыхар Пінска прыехаў па пляменніка і на дварэ атрымаў укус пчалы ў руку. Мужчына дастаў джала, але амаль адразу адчуў рэзкі боль. Дайшоўшы да аўтамабіля, ён раптам страціў прытомнасць. Яго жыццё ўратаваць не ўдалося.
Судова-медыцынскія экспертызы пацвердзілі: у абодвух выпадках прычынай смерці стаў анафілактычны шок — цяжкая алергічная рэакцыя на ўкус.
Эксперты нагадваюць: людзям з алергіяй на ўкусы неабходна кансультавацца з медыкамі і мець пры сабе антыгістамінныя прэпараты, асабліва ў сезон актыўнасці насякомых.